ອັດຕາເງິນເຟີ້ເດືອນຕຸລາຍັງສູງ ນຳໂດຍໝວດຮັກສາສຸຂະພາບ ແລະ ຢາ ເພີ່ມຂຶ້ນ 30,8%, ຮອງມາແມ່ນໝວດທີ່ພັກອາໄສ, ນໍ້າປະປາ, ໄຟຟ້າ ແລະ ເຊື້ອເພີງຫູງຕົ້ມ ເພີ່ມຂຶ້ນ 29,8%.
ສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ ໄດ້ອອກບົດລາຍງານສະພາບອັດຕາເງິນເຟີ້ປະຈຳເດືອນຕຸລາ 2024 ເຫັນວ່າ: ອັດຕາເງິນເຟີ້ເດືອນຕຸລາ 2024 ແມ່ນຢູ່ໃນລະດັບ 20,7% ໂດຍລວມຈັງຫວະການເພີ່ມຂຶ້ນຂອງລາຄາສິນຄ້າທຽບກັບປີຜ່ານມາແມ່ນຊ້າລົງ.

ໝວດສິນຄ້າທີ່ມີອັດຕາເງິນເຟີ້ສູງກວ່າໝູ່ແມ່ນ ໝວດຮັກສາສຸຂະພາບ ແລະ ຢາ ເຊິ່ງມີອັດຕາເງິນເຟີ້ຢູ່ໃນລະດັບ 30,8%, ຮອງມາແມ່ນໝວດທີ່ພັກອາໄສ, ນໍ້າປະປາ, ໄຟຟ້າ ແລະ ເຊື້ອເພີງຫູງຕົ້ມ ເພີ່ມຂຶ້ນ 29,8%; ໝວດຮ້ານອາຫານ ແລະ ໂຮງແຮມ ເພີ່ມຂຶ້ນ 27,5%, ໝວດເຄື່ອງໃຊ້ໃນເຮືອນ ເພີ່ມຂຶ້ນ 27,3%, ໝວດການສຶກສາ 26,3%.
ສໍາລັບໝວດສະບຽງອາຫານ ແລະ ເຄື່ອງດື່ມບໍ່ມີທາດເຫຼົ້າ ເຊິ່ງເປັນໝວດສິນຄ້າທີ່ມີນໍ້າໜັກການຊົມໃຊ້ກວມເອົາຫຼາຍກວ່າໝູ່ແມ່ນເພີ່ມຂຶ້ນ 22,1% ເມື່ອສັງເກດການປ່ຽນແປງຂອງລາຄາເດືອນຕຸລາ ທຽບກັບເດືອນກັນຍາ ປີ 2024 ເຫັນວ່າຍັງສືບຕໍ່ເພີ່ມຂຶ້ນຈາກເດືອນທີ່ຜ່ານຢູ່ໃນລະດັບ 1,6%.

ໃນນັ້ນ, ໝວດສິນຄ້າທີ່ມີການປ່ຽນແປງຫຼາຍ ແມ່ນໝວດສະບຽງອາຫານ ແລະ ເຄື່ອງດື່ມບໍ່ມີທາດເຫຼົ້າ ເພີ່ມຂຶ້ນ 2,3%; ໃນນີ້ລາຄາຊີ້ນ ເພີ່ມຂຶ້ນ 1,7%, ປາ ແລະ ອາຫານທະເລ ເພີ່ມຂຶ້ນ 3,2%, ໝາກໄມ້ ເພີ່ມຂຶ້ນ 2,5%, ຜັກສົດ ເພີ່ມຂຶ້ນ 6,1%.
ໝວດຄົມມະນາຄົມ ແລະ ການຂົນສົ່ງ ເພີ່ມຂຶ້ນ 1,3% ພົ້ນເດັ່ນແມ່ນລາຄາລົດຈັກ ເພີ່ມຂຶ້ນ 3,7%, ນໍ້າມັນແອັດຊັງທໍາມະດາ ເພີ່ມຂຶ້ນ 1,7%, ນໍ້າມັນກາຊວນ ເພີ່ມຂຶ້ນ1,4%.
ໝວດຮັກສາສຸຂະພາບ ແລະ ຢາ ເພີ່ມຂຶ້ນ 1,3% ເປັນຕົ້ນແມ່ນຢາຊະນິດຕ້ານເຊື້ອ ເພີ່ມຂຶ້ນ 2,2%, ຢາແກ້ໄຂ້ເດັກນ້ອຍ ເພີ່ມຂຶ້ນ 1,2%.

ສາເຫດຕົ້ນຕໍທີ່ເຮັດໃຫ້ອັດຕາເງິນເຟີ້ເດືອນຕຸລາ 2024 ມີທ່າອ່ຽງເໜັງຕີງເພີ່ມຂຶ້ນໃນຈັງຫວະທີ່ຊ້າລົງ ເນື່ອງຈາກສະພາບກົດດັນຈາກອັດຕາແລກປ່ຽນທີ່ຫຼຸດລົງ ຫຼື ອັດຕາແລກປ່ຽນແມ່ນເລີ່ມມີສະຖຽນລະພາບດີຂຶ້ນ ບວກກັບສະພາບການປ່ຽນແປງຂອງລາຄານໍ້າມັນຕະຫຼາດໂລກ ແລະ ພາຍໃນບໍ່ໄດ້ປັບຂຶ້ນຫຼາຍ ເມື່ອທຽບກັບເດືອນກັນຍາຜ່ານມາ.
ແຕ່ເຖິງຢ່າງໃດກໍຕາມ, ຫຼາຍລາຍການສິນຄ້າຍັງສືບຕໍ່ປັບຂຶ້ນເມື່ອທຽບກັບເດືອນຜ່ານມາ ໂດຍສະເພາະລາຍການສິນຄ້າໃນໝວດສະບຽງອາຫານ ອັນເປັນປັດໄຈຕົ້ນຕໍປິ່ນອ້ອມການດຳລົງຊີວິດຂອງພໍ່ແມ່ປະຊາຊົນ.